த.வெ.க.அரசின் தனியார் மயமாக்கல் கொள்கையை எதிர்த்து தொ.மு.ச. எதிர்ப்பை வலியுறுத்தியது.

 அனைத்துத் துறைகளிலும் தனியார்மயமாக்கும் போக்கை தமிழக அரசு கைவிட வேண்டும்: தொ.மு.ச. செயற்குழு கூட்டத்தில் வலியுறுத்தல்.

தொழிலாளர் முன்னேற்ற சங்கப் பேரவையின் (தொ.மு.ச.) தலைமைச் செயற்குழு கூட்டம், அச்சங்கத்தின் பொதுச்செயலாளர் சண்முகம் தலைமையில் திருச்சி கலைஞர் அறிவாலயத்தில் நேற்று நடைபெற்றது.

​இக்கூட்டத்தில், திமுக அரசால் அறிவிக்கப்பட்ட 'உறுதியளிக்கப்பட்ட ஓய்வூதியத் திட்டத்தை' த.வெ.க. அரசு சீர்குலைக்கக் கூடாது; தமிழக அரசை விமர்சிப்பவர்கள் மீது அடக்குமுறையை ஏவி பழிவாங்கும் போக்கை த.வெ.க. அரசு கைவிட வேண்டும்; கொள்கைத் தெளிவற்ற முறையில் நிதிநிலை அறிக்கையை வெளியிட்டு, திமுக மீது புழுதிவாரித் தூற்றுவதையே வாடிக்கையாகக் கொண்டுள்ள த.வெ.க. அரசுக்குக் கடும் கண்டனம் என்பன உள்ளிட்ட 35 தீர்மானங்கள் நிறைவேற்றப்பட்டன.

​கூட்டத்திற்குப் பின்னர் செய்தியாளர்களிடம் சண்முகம் கூறியதாவது:

​மத்திய அரசும், மாநில அரசும் தொடர்ந்து தொழிலாளர்கள் மீது அடக்குமுறையை ஏவி, அவர்களின் உரிமைகளைப் பறித்து வருகின்றன. அதனை எதிர்கொள்ளும் வகையில் அனைவரும் செயல்பட வேண்டும் எனச் செயற்குழுக் கூட்டத்தில் தொ.மு.ச. நிர்வாகிகளுக்கு அறிவுறுத்தப்பட்டுள்ளது.

​அனைத்து மாநிலங்களும் ஏற்றுக்கொண்டால் மட்டுமே மத்திய அரசால் 4 தொழிலாளர் சட்டத் தொகுப்புகளை அமல்படுத்த முடியும். ஆனால், பெரும்பாலான மாநிலங்கள் ஏற்றுக்கொள்ளாத நிலையிலும், அதனைச் செயல்படுத்த மத்திய அரசு அவசரம் காட்டுகிறது. மத்திய அரசு இந்த 4 தொழிலாளர் சட்டத் தொகுப்புகளையும் செயல்படுத்தக் கூடாது.

​திமுக ஆட்சியில் ஓய்வூதியர்களுக்கு 'உறுதியளிக்கப்பட்ட ஓய்வூதியத் திட்டம்' செயல்படுத்தப்பட்டது. ஆனால், தற்போதுள்ள த.வெ.க. அரசு நிதி இல்லை எனக் கூறி அத்திட்டத்தைப் புறக்கணிக்கிறது. அரசு உடனடியாக உறுதியளிக்கப்பட்ட ஓய்வூதியத் திட்டத்தைச் செயல்படுத்த வேண்டும்.

​தமிழக அரசு அனைத்துத் துறைகளிலும் தனியார்மயத்தைப் புகுத்துகிறது. தனியார்மயம் வந்தால் இடஒதுக்கீடு பறிபோகும். அரசுத் துறையாக இருந்தால் மட்டுமே இடஒதுக்கீடு பின்பற்றப்பட்டு அனைத்துத் தரப்பினருக்கும் வேலைவாய்ப்பு கிடைக்கும். எனவே, அனைத்துத் துறைகளிலும் தனியார்மயமாக்கும் போக்கை தமிழக அரசு கைவிட வேண்டும்.

​திமுக ஆட்சியில் பல்வேறு சாதனைத் திட்டங்கள் கொண்டுவரப்பட்டன. அந்த சாதனைகளை மறைக்கும் முயற்சியில்தான் த.வெ.க. அரசு ஈடுபட்டு வருகிறது. ஒப்பந்த அடிப்படையில் பணியாளர்களை நியமிப்பதை நாங்கள் எப்போதும் எதிர்ப்போம். திமுக ஆட்சியிலும் அதை எதிர்த்தோம்; தற்போதைய ஆட்சியிலும் அதை எதிர்க்கிறோம்.

​இவ்வாறு அவர் கூறினார்.